კორონავირუსით ინფიცირების ოთხივე ახალი შემთხვევა იმპორტირებულია. ამის შესახებ ინფექციური საავადმყოფოს სამედიცინო დირექტორმა მარინა ეზუგბაიამ განაცხადა.
„დღეს დადასტურებული შემთხვევების რაოდენობამ 4-ით მოიმატა. ამ ეტაპზე შემთხვევების საერთო რიცხვი 999-ს შეადგენს. გამოჯანმრთელებულების რიცხვი კი 13-ით გაიზარდა. ოთხივე ახალი შემთხვევა შემოტანილია, ისინი ყველა სატვირთო ავტომანქანის მძღოლები არიან“, - აღნიშნა მარინა ეზუგბაიამ.
მისი თქმით, ინფექციურ კლინიკაში კორონავირუსით ინფიცირებული ახალი პაციენტი არ შეუყვანიათ. ამ დროისთვის ცენტრში 24 ინფიცირებული პაციენტი რჩება.
საქართველოში კორონავირუსის 4 ახალი შემთხვევა დადასტურდა, 13 პაციენტი კი გამოჯანმრთელდა.
კორონავირუსით ინფიცირების პირველი შემთხვევა ქვეყანაში მიმდინარე წლის 26 თებერვალს დადასტურდა.
ჯანდაცვის მსოფლიო ორგანიზაციამ კორონავირუსი პანდემიად 2020 წლის 11 მარტს გამოაცხადა.