ჯანდაცვის სამინისტრო კოვიდდადასტურებული კაცის გარდაცვალებასთან დაკავშირებით ინფორმაციას ავრცელებს
1603898052
ჯანდაცვის სამინისტროს პრესსამსახურის წარმომადგენელი ლაგოდეხში 71 წლის მამაკაცის გარდაცვალების შესახებ ინფორმაციას ავრცელებს.
„უპირველეს ყოვლისა, მწუხარებას გამოვთქვამთ დღეს ლაგოდეხში კოვიდდადასტურებული მამაკაცის გარდაცვალებასთან დაკავშირებით.
გვსურს, საზოგადოებას დამატებითი ინფორმაცია მივაწოდოთ აღნიშნული სამწუხარო შემთხვევის შესახებ და ცალსახად განვმარტოთ, რომ მამაკაცი შესაბამის სამედიცინო მკურნალობას ლაგოდეხის „არქიმედეს კლინიკაში“ გადიოდა. ზემოაღნიშნული კლინიკა გახლავთ კოვიდ 19-ის სახელმწიფო მართვაში ჩართული დაწესებულება, რომელიც პასუხისმგებელია თითოეული პაციენტის ჯანმრთელობის მდგომარეობაზე.
აქვე გვინდა აღვნიშნოთ, რომ 71 წლის მამაკაცს, გარდა კოვიდ 19-ისა, ასევე ჰქონდა გულის იშემიური დაავადება. ის კლინიკაში 23 ოქტომბერს მოთავსდა, რის შემდეგაც მედიცინის მუშაკებმა ყველაფერი გააკეთეს პაციენტის გადასარჩენად, თუმცა სამწუხაროდ, მამაკაცი დღეს, 28 ოქტომბერს, გულის უეცარი გაჩერებით გარდაიცვალა“, - აღნიშნულია გავრცელებულ ინფორმაციაში.
შეგახსენებთ, ბოლო 24 საათის მონაცემებით საქართველოში კორონავირუსით კიდევ 15 პაციენტი გარდაიცვალა.
