კორონავირუსი განვითარებულ ქვეყნებში გაცილებით სწრაფად გავრცელდა, ვიდრე განვითარებადში, შესაძლოა გარკვეულწილად ეს აღურიცხაობასა და სუსტ სტატისტიკასაც დაბრალდეს, თუმცა უმთავრესი მიზეზი უფრო ხშირი კონტაქტია, როგორც ქვეყნის შიგნით, ასევე მისი საზღვრებს გარეთ.
G7-ის, იგივე დიდი შვიდიანის ქვეყნების მოსახლეობის წილი დედამიწის მოსახლეობის 10%-ს შეადგენს, თუმცა ეს სახელმწიფოები ჯამურად პლანეტის მშპ-ს 45%-ზე მეტს ფლობენ. ლაბორატორიულად დადასტურებული კორონავირუსის შემთხვევათა თითქმის ნახევარი სწორედ ამ ქვეყნებზე მოდის.
1) იტალია - 74 386 (7503)
2) აშშ - 68 489 (1032)
3) გერმანია - 37 323 (206)
4) საფრანგეთი - 25 233 (1331)
5) ბრიტანეთი - 9529 (465)
6) კანადა - 3409 (36)
7) იაპონია - 1307 (45)
ეს ჯამში 219 676 შემთხვევაა, რაც მსოფლიოში ინფიცირებულთა რაოდენობის 46.5%-ს შეადგენს. ამ 7 ქვეყანაში კორონავირუსით სულ 10 618 ადამიანი გარდაიცვალა, გარდაცვლილთა საერთო რაოდენობის 49.8%.
იტალიის შემდეგ, კორონავირუსის გამო სიტუაცია მძიმდება შეერთებულ შტატებში და დიდი შვიდიანის არაწევრ ესპანეთში. ბოლო 3 დღეა აშშ-ში ინფიცირებულთა რაოდენობა ხუთნიშნა რიცხვით იზრდება და ტენდენციის შენარჩუნების შემთხვევაში ის ჩინეთსაც გაუსწრებს. ინფიცირებულთა რაოდენობით ესპანეთი მეოთხე ადგილზეა, თუმცა გარდაცვლილთა რაოდენობით 25 მარტს ესპანეთმა ჩინეთს გაასწრო და მეორე ადგილი დაიკავა.