სამხრეთ კავკასიაში კორონავირუსით ინფიცირებულთა რაოდენობა 1448-მდე გაიზარდა
1586012163
კორონავირუსით ინფიცირებულთა რაოდენობა მსოფლიოს 200-ზე მეტი ქვეყნის მსგავსად, იზრდება როგორც საქართველოში, ასევე მის მეზობელ ქვეყნებში. რუსეთში ინფიცირებულთა რაოდენობა 4700-ს აჭარბებს, თურქეთში, 20 000-ს, სომხეთსა და აზერბაიჯანში 1000-მდე ნარჩუნდება.
სამხრეთ კავკასიის სამი სახელმწიფოდან კორონავირუსის პირველი შემთხვევა ყველაზე გვიან 2 მარტს სომხეთში დაფიქსირდა, თუმცა ყველაზე სწრაფადაც ამ ქვეყანაში გავრცელდა. სწრაფი გავრცელების მიზეზი 2 შემთხვევა გახდა: წვეულება ქალაქ ეჩმიაძინში და მსხვილ სამკერვალო ფაბრიკაში შეტანილი ვირუსი. 4 აპრილის მდგომარეობით სომხეთში ინფიცირების 770 შემთხვევაა აღრიცხული, საიდანაც 7 გარდაიცვალა და 43 გამოჯანმრთელდა.
აზერბაიჯანში COVID 19-ის გავრცელება 28 თებერვლიდან დაიწყო. 4 აპრილის მდგომარეობით ინფიცირების 521 შემთხვევაა ლაბორატორიულად დადასტურებული. 5 პაციენტი გარდაიცვალა, 32 გამონანმრთელდა.
საქართველოში ინფიცირების პირველი შემთხვევა 26 თებერვალს დაფიქსირდა. 4 აპრილის მდგომარეობით სულ აღრიცხულია 157 შემთხვევა, საიდანაც 1 პაციენტი გარდაიცვალა, უცხო ქვეყნის 2 მოქალაქე სამშობლოში იქნა დაბრუნებული, 28 პირი გამოჯანმრთელდა. ამჟამად მკურნალობის კურსს 126 პაციენტი გადის. კარანტინის რეჟიმში მყოფთა რაოდენობა 5526-ს შეადგენს, 344 პირი სტაციონალური მეთვალყურეობის ქვეშ რჩება.
ინფიცირებულთა რაოდენობა 4 აპრილს საქართველოში 2-ით, სომხეთში 34-ით, ხოლო აზებრაიჯანში 78-ით გაიზარდა. ჯამში სამივე სახელმწიფოში 26 თებერვლიდან დღემდე ინფიცირების 1448 შემთხვევა დაფიქსირდა.
