გიორგი ცუქირიძე: Fitch-მა მთავრობის ანტიკრიზისული ღონისძიებების მიმდინარე პროცესებში პოზიტიურ ზეგავლენაზე გაამახვილა ყურადღება
1597482360
მსოფლიოს წამყვანმა სარეიტინგო სააგენტომ Fitch-მა, რომლის სარეიტინგო მაჩვენებლებზე დიდწილად ხდება ინვესტორთა პოზიციონირება, საქართველოს სუვერენული საკრედიტო რეიტინგი და რეიტინგის პერსპექტივა უცვლელად - „BB“ დონეზე ნეგატიური პერსპექტივით დატოვა.
აღნიშნულ თემას ეკონომიკის ექსპერტი გიორგი ცუცქირიძე სოციალურ ქსელში ეხმაურება. მისი თქმით, დღეს კოვიდკრიზისის პირობებში, მსოფლიოს წამყვანი სარეიტინგო კომპანიის ეს შეფასება რამდენიმე გარემოების გამო არის მნიშვნელოვანი.
როგორც ცუცქირიძე აღნიშნავს, კოვიდკრიზისი იმით განსხვავდება ყველა სხვა გლობალური კრიზისებისაგან, გასული საუკუნის 30-იანი წლების დიდი დეპრესიიდან მოყოლებული, რომ მას საფუძვლად არ უდევს წმინდა ეკონომიკური სარჩული და არც ფინანსური ბაზრების კრიზისთან არის დაკავშირებული, რომელთა პროგნოზირებაც მეტ-ნაკლებად მოსალოდნელიც იყო. ეს არის პირველი გლობალური შოკი, რომელიც ვირუსულმა პანდემიამ გამოიწვია და ქვეყნების ეკონომიკების ჩაკეტვის გამო, მიწოდების და მოთხოვნის ჯაჭვების მკვეთრი გაწყვეტით წარიმართა. სწორედ ეს გაურკვევლობა იყო და გარკვეულწილად დღესაც არის, რომ პროგნოზირების შესაძლებლობას ამცირებს.
„სარეიტინგო სააგენტოს გადაწყვეტილება იმითაც არის აღსანიშნავი, რომ გლობალური ეკონომიკის კონტექსტში, Fitch-ის პროგნოზით ევროზონის ეკონომიკა მიმდინარე წელს 8%-ით შემცირდება, მაშინ როდესაც საქართველოს ეკონომიკის რეალური 4.8%-იანი კლების პროგნოზი მნიშვნელოვნად არის გაუმჯობესებული იგივე პირველი კვარტლის პროგნოზთან შედარებით, რაც მინიმუმ 9 %-იან კლებას ითვალისწინებდა, ხოლო უკვე 2021 წელს ეკონომიკის 4.5%-იანი ზრდააა მოსალოდნელი,“ - განაცხადა ექსპერტმა.
მისი თქმით, აღსანიშნავია, როიმ გლობალური პანდემიის ეკონომიკებზე ნეგატიური ზეგავლენის შედეგად, Fitch-მა შეამცირა ისეთი წამყვანი და ჩვენზე გაცილებით დივერსიფიცირებული ეკონომიკის ქვეყნების დიდი ნაწილის სუვერენული რეიტინგი, როგორიცაა აშშ, იაპონია, საფრანგეთი და კანადა.
„გლობალური ეკონომიკის განვითარების კონტექსტში, Fitch-ის პროგნოზით, ქვეყნის უახლოსი ორი წლის პერსპექტივა არის დადებითი, რაც ნიშნავს, რომ გაზრდილია საქართველოს ეკონომიკის მდგრადობა შოკების მიმართ, ეროვნული ბანკის მიერ გატარებულ მაკროპრუდენციულ ღონისძიებებთან ერთად, საფინანსო სექტორის სტაბილურობის და ინფლაციის მიზნობრივ მაჩვენებელთან მიახლოების თვალსაზრისით,“ - განაცხადა ცუცუქირიძემ.
