პარლამენტს კონკრეტულ სასჯელებზე ამნისტიის გამოცხადების ინიციატივით მიმართეს. საკანონმდებლო წინადადება მოძრაობა „შემახე ამნისტია“-მ დაარეგისტრირდა. დოკუმენტში სასჯელების ფართო ჩამონათვალია, რომელიც ეხება ძალადობას, არასრულწლოვანთან სესქსუალური კავშირის დამყარება, დედის მიერ ახალშობილის განზრახ მკვლელობას და ა.შ.
PIA.GE ინიციატორს, უფლებადამცველს ალექსანდრე კობაიძეს ესაუბრა.
როგორც უფლებადამცველი განმარტავს, საქართველოში დაახლოებით 10 000 პატიმარია, რაც პატარა სახელმწიფოსთვის საგანგაშო მაჩვენებელია. სახელმწიფოს ვალდებულებაა, თითოეულ ინდივიდზე იზრუნოს. პატიმრებს კი ერთი შანსი უნდა მიეცეთ.
„რაც „ქართული ოცნება“ ხელისუფლებაში მოვიდა, ამნისტია არ ყოფილა. ბევრი პატიმარია, მათ შორის პრობაციონერი. ჩვენნაირ სახელმწიფოს 2 000 პატიმარი უნდა ჰყავდეს, ჩვენ კი, 5-ჯერ მეტი გვყავს. ეს იმის მანიშნებელია, რომ ამნისტიის დროა.
ხელისუფლება პატიმრების ხარჯზე მოვიდა და პატივი უნდა სცეს ამ კატეგორიას. მოქმედი ხელისუფლებიდან ბევრი იყო პატიმარი და ისინი უფრო მეტად გრძნობენ, როგორია პატიმრის ბედი.
ჩვენ ვითხოვთ საყოველთაო ამნისტიას, რომელიც ბევრ ადამიანს შეეხება, თითქმის ყველას“,- აღნიშნა ალექსანდრე კობაიძემ.
ალექსანდრე კობაიძე მიიჩნევს, რომ საყოველთაო ამნისტია ქვეყანაში კრიმინალს არ გაზრდის.
„ვფიქრობ, ამნისტია ყველას უნდა შეეხოს, თუმცა ეს არ ნიშნავს იმას, რომ 100%-ით უნდა მოხდეს საკანონმდებლო წინადადების გაზიარება. ინიციატივა საყოველთაოა, გადაწყვეტილებების მიმღებები არიან დეპუტატები“, - აცხადებს ალექსანდრე კობაიძე.
საკანონმდებლო წინადადებაში საუბარია, რომ ამნისტია ოჯახში ძალადობის მუხლით დაკავებულებსაც უნდა შეეხოთ. უფლებადამცველი მიიჩნევს, რომ სახელმწიფომ მათ ერთი შანსი უნდა მისცეს.
„ოჯახში ძალადობის მუხლით დაკავებულებს სახელმწიფომ ერთი შანსი უნდა მისცეს, რომ გამოსწორდნენ. თუმცა, ეს ადამიანები დანაშაულს თუ განმეორებით ჩაიდენენ, არსებობს შესაბამისი ორგანოები - შსს, პროკურატურა, რომლებიც ვალდებულები არიან ნებისმიერ დანაშაულზე მყისიერი რეაგირება მოახდინონ. ეს არის უტრირება - თუ ადამიანებს ციხიდან გამოვუშვებთ, კრიმინალი გაიზრდება. კრიმინალის ზრდას სხვადასხვა საკითხები უწყობს ხელს, მაგალითად სოციალურ-ეკონომიკური პრობლემა და არა ის, რომ ადამიანს ვთქვათ ერთ შანს მისცემ“,- აცხადებს ალექსანდრე კობაიძე.
ახალშობილის მკვლელობაზე დაპატიმრებული დედის ამნისტია - ამასთან დაკავშირებით უფლებადამცველის მოსაზრებაა:
„მორალურად საშინელი რამ არის. გასაგებია მკაცრად გამოიყურება აღნიშნული მუხლები. ამ შემთხვევაში მთავარია, რომ საკანონმდებლო წინადადებაა წარდგენილი, ამნისტია თითქმის ყველა მუხლს ეხება, დანარჩენი დეპუტატებმა განსაზღვრონ. პლენარულ სხდომაზე მსჯელობა გაიმართება, მათაც შეუძლიათ გვითხრან, იცით ეს არაეთიკურია, რაღაც ნორმებს სცდება და ა.შ.“,- განაცხადა ალექსანდრე კობაიძემ.
ალექსანდრე კობაიძე ამბობს, რომ „ამნისტიის შესახებ“ საკანონმდებლო წინადადება სასჯელების ფართო ჩამონათვალს მოიცავს. ინიციატორის სურვილია, რომ ამნისტია ყველას შეეხოს, თუმცა საბოლოო გადაწყვეტილებას დეპუტატები მიიღებენ, ვის შეეხოს ამნისტია და ვის არა.