„ჩემი ძმა ამბობს ისეთ რაღაცას, რაც ნამდვილად არ უნდა ეთქვა“- შაქარაშვილის საქმეზე ბრალდებულის ძმა
1599377286
5 სექტემბერს გარდაცვლილი ფეხბურთელის, გიორგი შაქარაშვილის საქმეზე ბრალდებულების ციხის ჩანაწერები გავრცელდა.
კადრებში ნიკოილოზ რევაზიშვილი საუბრობს მოწმეზე, მის თანამესაკნე, კობა ჩიტიძეზე, რომელმაც გარკვეული პერიოდის წინ მისცა ჩვენება და პროკურატურამ აგვისტოში გაასაჯაროვა, სადაც ის გამოძიებას რევაზიშვილის მონაყოლს აცნობს.
გავრცელებული კადრების თანახმად, რევაზიშვილი გეგმავს როგორ გაუსწორდეს ჩიტიძეს.
ნიკოლოზ რევაზიშვილის ძმა, ვახო რევაზიშვილი ამბობს, რომ კადრებში არა დამნაშავის, არამედ გამწარებული ადამიანის პოზიცია ჩანს.
„თანამესაკნესთან საუბრისას ჩემი ძმა გამწარებული საუბრობს და ამბობს ისეთ რაღაცას, რაც ნამდვილად არ უნდა ეთქვა. თუმცა წარმოიდგინეთ როგორი შეგრძნებაა, როდესაც უდანაშაულოდ გამოგკეტავენ ციხეში“,- განაცხადა ნიკოლოზ რევაზიშვილის ძმამ, ვახო რევაზიშვილმა ტელეკომპანია „პირველის“ ეთერში.
მისი თქმით, ჩიტიძეს ამის გაკეთება წინასწარ განზრახული და დაგეგმილი ჰქონდა, რადგან შეემსუბუქებინა საკუთარი სასჯელი.
ცნობისთვის, მიმდინარე წლის 19 ივნისს ახალგაზრდა სპორტსმენის გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. 4-დღიანი სამძებრო სამუშაოების შემდეგ, გიორგი შაქარაშვილის ცხედარი წყალში იპოვეს. შაქარაშვილის გარდაცვალების საქმეზე 17 პირია დაკავებული.
მათგან 5 პირს ბრალი ჯგუფურად განზრახ მკვლელობის მუხლით ედებათ, ხოლო 12 პირს გამოძიება ჯგუფურად ძალადობის ორგანიზებას, მასში მონაწილეობასა და თავისუფლების უკანონო აღკვეთას ედავება.
