სამხედრო ექიმები კარანტინის ზონაში ყველა შემსვლელ და გამომსვლელს სამედიცინო შემოწმებას უტარებენ
1585387379
საქართველოს თავდაცვის ძალების აღმოსავლეთ სარდლობის IV მექანიზებული ბრიგადის სამხედრო ექიმები კორონავირუსის გავრცელების პრევენციის მიზნით თავდაცვის ძალების მიერ სპეციალურად მოწყობილ ხუთ საკონტროლო გამშვებ პუნქტზე ყველა შემსვლელ და გამომსვლელ პირს პირველად სამედიცინო შემოწმებას უტარებენ.
თავდაცვის სამინისტროს ინფორმაციით, თითოეულ საგუშაგოზე ოთხი მედიკოსი და ერთი ექიმია მობილიზებული. ისინი სპეციალური ტანსაცმლითა და სამედიცინო აპარატურით არიან აღჭურვილები. ტემპერატურის დაფიქსირების შემთხვევაში, მოქალაქე მედიკოსებს საველე სამედიცინო პუნქტში მოწყობილ იზოლაციის ზონაში გადაჰყავთ, სადაც პუნქტის ექიმის მიერ ხდება ტემპერატურის გადამოწმება, კონტაქტების მოძიება და სიმპტომების შესახებ ინფორმაციის დამუშავება. მაღალი ტემპერატურის დადასტურებისას უფროსი ექიმი ეპიდემიოლოგიურ ჯგუფსა და აღმოსავლეთ სარდლობის მართვის ცენტრს აწვდის ინფორმაციას, მოქალაქე კი მარნეულის ან თბილისის შესაბამის სამედიცინო დაწესებულებაში გადაჰყავთ. რადიაციული, ქიმიური და ბიოლოგიური საინჟინრო ჯგუფის მიერ მიმდებარე ტერიტორია სადეზინფექციო ხსნარით მუშავდება.
თავდაცვის ძალების სამედიცინო დეპარტამენტის მიერ მუდმივად ხორციელდება ყველა საგუშაგოს მომარაგება მედიკამენტებით, სადეზინფექციო ხსნარითა და სამედიცინო ინდივიდუალური დამცავი საშუალებებით. საველე სამედიცინო პუნქტთან 24-საათიან რეჟიმში ამბულანსია მობილიზებული, რომელიც სამხედროების მიერ გადაუდებელი დახმარებისთვის გამოიყენება, როგორც პირადი შემადგენლობის, ასევე სამოქალაქო პირებისთვის.
კორონავირუსის გავრცელების პრევენციის მიზნით თავდაცვის ძალების აღმოსავლეთ სარდლობის პირადი შემადგენლობა შსს-ს და უსაფრთხოების სამსახურის წარმომადგენლებთან ერთად ტერიტორიას მკაცრად აკონტროლებს.
