მაჭავარიანი: პრემიერის გზავნილი მნიშვნელოვანია ჩვენი პარტნიორებისთვის
1601051690
„პრემიერ გახარიას ყველა გზავნილი მნიშვნელოვანია ჩვენი პარტნიორებისა და მეგობრებისთვის, რომელთაც განუხრელად დიდი წვლილი შეაქვთ ჩვენი ქვეყნის განვითარებისა და დემოკრატიზაციის პროცესში“, - ასეთი შეფასება მისცა თავის facebook პოსტში ფინანსთა მინისტრმა ივანე მაჭავარიანმა საქართველოს პრემიერ-მინისტრის გიორგი გახარიას გაერო-ს გენერალური ასამბლეის 75-ე სესიაზე სიტყვით გამოსვლას.
როგორც ივანე მაჭავარიანი აღნიშნავს, პრემიერმა ისაუბრა ყველა იმ აქტუალურ პრობლემასა და გამოწვევაზე, რომელიც დღეს ქვეყანაშია.
„ძალიან მნიშვნელოვანი გამოსვლა ჰქონდა საქართველოს პრემიერ-მინისტრ გიორგი გახარიას გაეროს გენერალური ასამბლეის 75-ე სესიაზე. მან ისაუბრა ოკუპაციასა და რუსეთის მხრიდან უკანონო ბორდერიზაციაზე და ხაზი გაუსვა საერთაშორისო მხარდაჭერის აუცილებლობას, რათა მსოფლიომ ერთობლივი ძალებით აიძულოს რუსეთი, შეასრულოს საერთაშორისო ნორმები და ნაკისრი ვალდებულებები. სიტყვით გამოსვლისას, ქვეყნის მეთაურმა კიდევ ერთხელ უთხრა საერთაშორისო თანამეგობრობას, რომ საქართველო ევროპული ცივილიზაციის ნაწილია და რომ ჩვენი ქვეყნის განვითარების გზა უცვლელია - ეს არის ევროპული და ევროატლანტიკური ინტეგრაცია. გამოსვლაში იგი შეეხო არჩევნების თემასაც და კიდევ ერთხელ დაადასტურა, რომ საქართველოს ხელისუფლება ყველაფერს აკეთებს და გააკეთებს იმისთვის, რომ ამ უმნიშვნელოვანესმა არჩევნებმა, პანდემიის პირობებშიც თავისუფალ, მიუკერძოებელ, გამჭვირვალე და დემოკრატიულ გარემოში ჩაიაროს, სადაც საერთაშორისო დამკვირვებლების მაქსიმალური დასწრების ფონზე, საქართველოს ყველა მოქალაქეს მიეცემა შესაძლებლობა, თავისუფლად გამოხატოს საკუთარი პოლიტიკური ნება“,- აღნიშნავს ფინანსთა მინისტრი ივანე მაჭავარიანი.
