მთავარი

ძიება

ვიდეო

ქვიზები

კონტაქტი

კახა კალაძემ სამგორში ახლადრეაბილიტირებული სკვერი დაათვალიერა

კალაძე რეაბილიტირებულ სკვერში

სამგორის რაიონში, თაყაიშვილის ქუჩაზე, პოლიციის შენობის მიმდებარედ, 8 000 კვადრატულ მეტრ ფართობზე არსებული სკვერი რეაბილიტირდა. ინფორმაციას თბილისის მერიის პრესსამსახურის წარმომადგენელი ავრცელებს.

ახლად რეაბილიტირებული სკვერი დედაქალაქის მერმა, კახა კალაძემ მერის მოადგილეებთან ერთად დაათვალიერა.

„სამგორის რაიონში მორიგი მნიშვნელოვანი პროექტი განხორციელდა. ეს არის რეკრეაციული სივრცე, დაახლოებით, 8 000 კვ.მ ფართობზე, რომლის სრული რეაბილიტაცია განხორციელდა. აქ იყო უმძიმესი მდგომარეობა და ადგილობრივი მოსახლეობის თხოვნა იყო, რომ მომხდარიყო ამ სივრცის მოწესრიგება და განახლება. დაირგო ახალი ხე-მცენარეები, დასასვენებელი სივრცეები, გაჩნდა ატრაქციონები და სასიამოვნოა, რომ ცივი ამინდის მიუხედავად, სკვერში ბავშვები არიან და ვარჯიშობენ. ეს ყველაფერი ხელს უწყობს ჯანსაღი ცხოვრების წესის დანერგვას და პოპულარიზაციას.

ჩვენი მიდგომაა, არა მხოლოდ სამგორის რაიონში, არამედ ყველა სხვა რაიონში, სადაც შესაძლებელია განახლება და მსგავსი სივრცეების მოწყობა, ყველგან განვახორციელოთ მსგავსი პროექტები. სიმწვანე და გაუმჯობესებული ეკოლოგია, ეს ის არის, რაც ჩვენს ქალაქს ძალიან სჭირდება და ჩვენ ამისთვის ყველაფერს გავაკეთებთ,“ - განაცხადა კახა კალაძემ.

არსებული ინფორმაციით, სკვერის ტერიტორიაზე მოეწყო განათების, ვიდეო მეთვალყურეობის და სარწყავი სისტემები, საფეხმავლო და საველოსიპედე ბილიკები, მშრალი ტიპის შადრევანი, საბავშვო და სპორტული მოედნები, კიბეები, დეკორატიული საყვავილე ქოთნები, ველოპარკინგი, სასმელი წყლის სოკო და წყარო, ასევე, განთავსდა საპარკე ფურნიტურა.

ჩატარდა გამწვანების სამუშაოები: დაირგო სხვადასხვა სახეობის 484 ხე და 62 ძირი ბუჩქი, ასევე, 1879 ძირი ბალახოვანი მცენარე; 6 000 კვადრატულ მეტრ ფართობზე დაითესა ბალახი.

პროექტი გარემოს დაცვის საქალაქო სამსახურმა განახორციელა.