კახი კავსაძე საავადმყოფოში გადაიყვანეს
1606583761
მსახიობი კახი კავსაძე საავადმყოფოში გადაიყვანეს.
პირველი საუნივერსიტეტო კლინიკის დირექტორის ლევან რატიანის თქმით, მსახიობის მდგომარეობა რთულია.
„კახი კავსაძე მართვით სუნთქვაზე იმყოფება, მდგომარეობა რთულია“,- განაცხადა ექიმმა.
კავსაძის ოჯახის წევრი ამბობს, რომ მსახიობს კორონავირუსი 3 დღის წინ გამოუვლინდა.
კახი კავსაძე 85 წლის არის.
საქართველოს სახალხო არტისტმა ქართულ კინოსა და თეატრში არაერთი სახასიათო და დასამახსოვრებელი როლი შექმნა, მათ შორის: ადამი („ღვთაებრივი კომედია“), თავადი კოწია („გუშინდელნი“), დევდარიანი („საბრალდებო დასკვნა“), ილიკო („მე, ბებია, ილიკო და ილარიონი“), სიმონ ჩაჩავა („კავკასიური ცარცის წრე“), კენტი („მეფე ლირი“), რასპუტინი („კვაჭი კვაჭანტირაძე“), ბატონი დევი („მერე რა, რომ სველია სველი იასამანი“) და სხვა.
მიღებული აქვს იპოლიტე ხვიჩიას სახელობის პრიზი „იპო“, კოტე მარჯანიშვილის სახელობის სახელმწიფო პრემია და შოთა რუსთაველის სახელობის სახელმწიფო პრემია.
კახი კავსაძე 1959 წლიდან რუსთაველის თეატრის მსახიობია. სწორედ რუსთაველის თეატრის წინ, 2008 წელს მსახიობის სახელობის ვარსკვლავი გაიხსნა.
