პომპეო: ჯანმო-მ იმედები არ გაამართლა
1597250162
აშშ-ის სახელმწიფო მდივნის მაიკ პომპეოს განცხადებით, ჯანდაცვის მსოფლიო ორგანიზაციამ კორონავირუსის პანდემიის დროს მოლოდინები ვერ გაამართლა. აღნიშნული განცხადება მან ჩეხეთში ვიზიტისას პარლამენტის ზედა პალატის დეპუტატის შეკითხვებზე პასუხისას გააკეთა.
„ჯანმო-მ კორონავირუსის პანდემიის დროს იმედები არ გაამართლა. ვირუსი ჩინეთში გამოჩნდა. ამ ორგანიზაციამ კი დაინტერესებულ პოლიტიკურ ძალებს მეცნიერებაზე ზეწოლის უფლება მისცა, რამაც მსოფლიოში ეკონომიკის კრიზისი გამოიწვია“, - განაცხადა მაიკ პომპეომ.
მისი თქმით, კორონავირუსის წარმოშობის გარემოება ჯერ კიდევ არ არის დადგენილი, რასაც ჩინეთის ხელისუფლება უშლის ხელს და ის ჯანმო-ზე ძლიერ ზეწოლას ახდენს.
ცნობისთვის, აშშ-მა ჯანმო-ს დატოვების შესახებ განცხადება მიმდინარე წლის 7 ივლისს გააკეთა, რასაც მაიკ პომპეოს მიერ ორგანიზაციის ჩინეთთან გარიგებაში დადანაშაულება და მისთვის დაფინანსების შეწყვეტა უძღოდა წინ.
