აშშ-ის სახელმწიფო მდივანი ენტონი ბლინკენი რუსეთის საგარეო საქმეთა მინისტრ სერგეი ლავროვთან G20-ის მინისტერიალზე მოლაპარაკებას არ გეგმავს. ამის შესახებ აშშ-ის სახელმწიფო დეპარტამენტის ოფიციალურმა წარმომადგენელმა ნედ პრაისმა განაცხადა.
„რა თქმა უნდა, მე არ ველოდები რაიმე შეხვედრას სახელმწიფო მდივან ბლინკენსა და საგარეო საქმეთა მინისტრ ლავროვს შორის“, - განაცხადა მან.
პრაისის თქმით, G20-ის მინისტერიალზე მოლოდინი აქვს, რომ ლიდერები მკაცრად დაგმობენ რუსეთის შეჭრას უკრაინის ტერიტორიაზე.
აღსანიშნავია, რომ G20-ის მინისტერიალი საგარეო საქმეთა მინისტრების შეხვედრა კუნძულ ბალიზე 7-8 ივლისს გაიმართება.
პრეზიდენტმა ვოლოდიმირ ზელენსკიმ განაცხადა, რომ უკრაინის მონაწილეობა G20-ის სამიტში უსაფრთხოების ვითარებაზე და სამიტის მონაწილეთა შემადგენლობაზე იქნება დამოკიდებული.
მანამდე კი იტალიის პრემიერ-მინისტრმა მარიო დრაგიმ განაცხადა, რომ გამორიცხულია რუსეთის ფედერაციის პრეზიდენტის ვლადიმერ პუტინის პირადი მონაწილეობა G20-ის სამიტში.
თავის მხრივ აღნიშნულს კრემლი გამოეხმაურა და განაცხადა, რომ პუტინის მონაწილეობა სამიტზე გამორიცხული არ არის.
აგრეთვე წაიკითხეთ:
🔴 „უბედურება ელოდება რუსეთის ფედერაციას“ - რუსეთის ყოფილი პრემიერი
🔴 ლისიჩანსკის აღება ოკუპანტებს ლუგანსკზე კონტროლის დამყარების საშუალებას აძლევს - ბრიტანული დაზვერვა