თავდაცვის მინისტრი: რუსეთი ოკუპანტია!
1596875765
„რუსეთი არის ოკუპანტი! ოკუპაცია უნდა დასრულდეს“,- ამის შესახებ საქართველოს თავდაცვის მინისტრმა ირაკლი ღარიბაშვილმა მუხათგვერდის ძმათა სასაფლაოზე განაცხადა, სადაც 2008 წლის აგვისტოს ომში დაღუპული გმირების ხსოვნას პატივი მიაგეს.
„ჩვენ გვყავს გმირი სამხედროები, რომლებმაც თავი გაწირეს სამშობლოსთვის. აგვისტოს ომი ტრაგედიაა, რომელმაც უზარმაზარი ნგრევა და დესტაბილიზაცია მოუტანა ჩვენს ქვეყანას.
ოკუპაცია გრძელდება, მისი შედეგები უმძიმესია ჩვენი ქვეყნისთვის, მომავალი თაობისთვის.
ჩვენი მთავრობა, გონივრული პოლიტიკით, ყველაფერს გააკეთებს იმისათვის, რომ ასეთი მძიმე განსაცდელი - ნგრევა, ომი და ოკუპაცია, მომავალში არ განმეორდეს. ეს არის ტრაგედია, რომელიც უნდა დასრულდეს. ოკუპაცია უნდა დასრულდეს, რუსეთი არის ოკუპანტი!“,- აღნიშნა ირაკლი ღარიბაშვილმა.
ცნობისთვის, რუსეთ-საქართველოს ომიდან 12 წელი გავიდა. 2008 წლის 8 აგვისტოს, პირველად ცივი ომის შემდეგ რუსეთის ფედერაციამ სხვა სახელმწიფოს წინააღმდეგ ღია სამხედრო აგრესია განახორციელა, რის შემდეგაც მის მიერვე ოკუპირებული რეგიონების ე.წ. დამოუკიდებლობა აღიარა.
ომი 5 დღეს გაგრძელდა. დასავლელ პარტნიორებს საქართველოსთვის პირდაპირი სამხედრო დახმარება არ გაუწევიათ, თუმცა მათი და უპირველესად შეერთებული შტატების ძალისხმევით თბილისის თავზე რუსეთის დროშა აღარ აფრიალებულა.
ომის შედეგად საქართველომ 125 სოფელზე დაკარგა კონტროლი. ცხინვალის რეგიონის სოფლების გარდა, რუსეთმა კოდორის ხეობის - ზემო აფხაზეთის ოკუპაციაც მოახდინა. დაიღუპა 170 ჯარისკაცი, 14 პოლიციელი და 228 სამოქალაქო პირი. 22 დღემდე დაკარგულად მიიჩნევა. ომის პერიოდში 150 000 ადამიანი დევნილად იქცა, მათგან 30 000 საკუთარ სახლებში დღემდე არ დაბრუნებულა. ომს ეკონომიკური ვარდნაც მოჰყვა.
